Seanca në Apelin e GJKKO/ "Gjyqi të jetë i hapur për mediat", Veliaj: Më izoluat 1 muaj në burg që të gjenit "prova të reja"

 

TIRANË- Në Apelin e GJKKO-së po zhvillohet seanca gjyqësorE për shqyrtimin e ankimimit të kryebashkiakut Erion Veliaj lidhur me ndryshimin e masës së sigurisë. Në sallën e gjyqit, Veliaj ka kërkuar që seanca të jetë hapur për mediat, pasi sipas tij nuk ka asnjë sekret në bisedat e telefonike me familjarët nga kabina e burgut. 

Më tej, kryebashkiaku ka thënë se SPAK nuk ka marrë parasysh sulmet publike të Sali Berishës ndaj drejtësisë së re si prova të reja, duke u fokusuar vetëm në telefonatat dhe mesazhet e tij personale me familjen.

“Keni sjell “prova të reja”, kërkoj të sillni kamerat dhe kjo seancë të jetë e hapur për median. Silllni mediat që t’i deklaroj publikisht edhe para tyre përgjimet e kryera ndaj meje. Nuk kam asnjë sekret në bisedat e telefonike me familjarët e mi nga kabina burgut. Më izoluat 1 muaj në burg që të gjenit “prova të reja. Saliu e ofendoi SPAK dhe e akuzoi si organizatë kriminale, çfarë e gjeti? Pse nuk u konsideruan prova të reja sulmet e Berishës ndaj SPAK?”, raportohet se ka thënë Veliaj.

Në fund të seancës, gjyqtari Engert Pëllumbi do të japë vendimin për ankimimin e kryebashkiakut dhe 4 biznesmenëve të tjerë për ndryshim të masës së sigurisë.  Veliaj dhe Elman Abule, ndaj të cilëve GJKKO caktoi masën "arrest në burg", ndodhen në seancë, ndërsa biznesmenët Shkëlqim Fusha, Gentian Sula dhe Meriman Palushi të cilët kanë masën "detyrim paraqitjeje", përfaqësohen nga avokatët. Bëhet me dije se në seancë janë të pranishëm edhe prokurori Ols Dado dhe kreu i Prokurorisë së Posaçme, Altin Dumani.