Ngritën një fabrikë kanabisi në një qendër të vjetër tregtare në Skoci, tre shqiptarët dënohen me burg (EMRAT)

BRITANI- Tre shqiptarë janë dënuar më burg për ngritjen e një fabrike kanabisi në një qendër tregtare të braktisur në Irvine të Skocisë. Elton Skënderi, 30 vjeç, Gjovalin Toma, 31 vjeç, dhe Eduard Daja, 39 vjeç, pranuan fajësinë pasi policia sekuestroi mijëra bimë narkotike në shtator 2024. Skënderi u dënua me pesë vjet e tre muaj burg, Toma me gjashtë vjet dhe Daja u dënua me gjashtë vjet e nëntë muaj, shkruan BBC.

Gjykata e Lartë në Glasgow u shpreh se sasia e sekuestruar e kanabisit vlerësohej diku midis 611,600 dhe 1,834,800 paundëve. Pas një informacioni nga Scottish Power, policia hyri me forcë dhe zbuloi një kultivim të madh kanabisi në dy katet e qendrës. Oficerët zbuluan gjithashtu të njëjtën strukturë në njësitë fqinje, ndërsa dera e qendrës tregtare ishte e blinduar me kamera sigurie të instaluara jashtë.

Policia sekuestroi më shumë se 3,000 bimë kanabisi në qendrën tregtare në Irvine, ku u zbulua dhe një vend që përshkruhej si "hapësirë ​​jetese" që përfshinte një dhomë gjumi, një zonë gatimi, një ngrohës elektrik, si dhe tavolina e karrige.

Skënderi dhe Toma u ndaluan atë natë pasi u përpoqën t'i iknin policisë. Daja u kap të nesërmen pasi u pa duke dalë nga një dalje zjarri në qendrën tregtare. Ai pretendoi se kishte fjetur në ndërtesë. Provat e gjurmëve të gishtërinjve dhe ato mjeko-ligjore lidhën Skenderin dhe Dajën me vendin e krimit.

Eduard Daja ishte dënuar me tetë muaj burg për një vepër të ngjashme penale në maj 2023 në Gjykatën e Kurorës në Leeds. Ai u dëbua në Tiranë në Shqipëri në korrik 2023, por sërish u kthye në Mbretërinë e Bashkuar.

Edhe Toma kishte një dënim të mëparshëm për kultivim kanabisi, ku u burgos për 14 muaj në Leeds në vitin 2022. Ai u urdhërua gjithashtu të kthehej në Shqipëri, por më pas kërkoi azil dhe çështja mbetet ende e hapur. Skenderi, ashtu si dy të tjerët kishte ardhur ilegalisht në Mbretërinë e Bashkuar.

elton skenderi gjovalin toma eduard daja