“Duhet të kishe përfunduar si Ilaria Sula,” drejtuesi i një klubi futbolli kërcënon dhe ofendon gjyqtaren në Itali, shkak humbja e ndeshjes

 

ITALI- Një episod tronditës me fyerje dhe kërcënime është regjistruar në një ndeshje të kampionatit të të rinjve në Itali. Raportohet se një gjyqtare e re femër është fyer dhe kërcënuar nga drejtuesi i klubit Sporting Terni gjatë një ndeshjeje të kategorisë nën 17 vjeç.

Sipas vendimit të gjyqtarit sportiv, gjatë pushimit mes pjesëve, drejtuesi është futur në dhomën e zhveshjes së gjyqtares duke komentuar vendimet e saj më të bërtitura. Mësohet se kjo bisedë është regjistruar me telefon.

Pas ndërprerjes së regjistrimit, ai ka shpërthyer në ofendime të rënda. Mësohet se ai gjithashtu ka thënë se gjyqtarja duhet të kishte përfunduar si Ilaria Sula. Ai gjithashtu ka deklaruar se në këtë pikë duhet të nxirret edhe thika.

“Duhet të kishe vdekur që e vogël. Duhej të përfundoje si Ilaria“, tha ai.

Si rrjedhojë e sjelljes së tij, sipas ANSA-s, drejtuesi është përjashtuar nga çdo aktivitet sportiv deri më 31 dhjetor 2028, një dënim i ashpër por i justifikuar, duke marrë parasysh tonin e dhunshëm dhe përmbajtjen e fjalëve të përdorura.

Edhe pas përjashtimit dhe nxjerrjes jashtë fushës, ai vazhdoi të tallej me gjyqtaren nga jashtë stadiumit, duke i drejtuar asaj fjalë ofenduese dhe duke simuluar lehjen e një qeni, në një përpjekje për ta denigruar.

Klubit Sporting Terni i është vendosur një gjobë prej 500 eurosh, për moskontrollin e sjelljes së përfaqësuesit të vet dhe për klimën e dhunshme që u krijua rreth ndeshjes. Ndeshja përfundoi me fitoren e Sangemini Sport, 4-0.

22-vjeçarja shqiptare Ilaria Sula u vra në mënyrë tragjike nga ish i dashuri i saj. 23-vjeçari filipinas tregoi se i mori jetën Ilarias në shtëpinë e tij dhe më pas e futi trupin e pajetë në një valixhe, duke e hedhur në një zonë pyjore jashtë Romës. Më pas ai përdori telefonin e 22-vjeçares për të fshirë gjurmët, duke u hequr si ajo dhe duke i thënë shoqeve të shqiptares se kishte shkuar në shtëpinë e një djali tjetër pranë Napolit.