TIRANË- Kryeministri Rama ka deklaruar ditën e sotme se do të sjellë në Shqipëri një ndër ekselencat më prestigjioze të shërbimit spitalor, si në praktikën private dhe në praktikën partneriteti publik–privat. Gjatë podcast-it të tij "Flasim", Rama tha se kjo do të ndikojë shumë pozitivisht në rritjen e standardeve të shërbimit publik spitalor të vendit.
Lideri i qeverisë u ndal edhe tek samiti europian, për të cilin tha se së bashku me liderët e Ballkanit Perëndimor dhe Komisioneren Europiane për Zgjerimin Marta Kos, bënë një bilanc të ecurisë së planit të ri të rritjes, ndanë pikëpamje të vlefshme për integrimin e mëtejshëm ekonomik në rajon dhe integrimin e vendit si rajon në Tregun e Përbashkët Europian. Në fund, Rama tha se Shqipëria tanimë nuk ndalet dot nga askush dhe për asnjë arsye, ndërkohë që kuotat e saj ndërkombëtarisht vazhdojnë të rriten.
“Para pak ditësh vizitova Dohën dhe kalova disa orë intensive diskutimesh me mikun tim të shtrenjtë, Kryeministrin e Katarit, Sheikun Muhamed bin Abdulrahman bin Jassim Al Thani, një ndër udhëheqësit më të talentuar e më të respektuar të botës së sotme, i cili do të vijë me shumë dëshirë në Shqipëri në muajt e parë të vitit të ri. Prekëm shumë tema me Kryeministrin dhe do të përgatisim një agjendë ambicioze bashkëpunimi, që do ta bëjmë publike gjatë vizitës së tij në Shqipëri, por mund të them qysh sot se do të sjellim në vendin tonë një ndër ekselencat më prestigjioze të shërbimit spitalor, qoftë si praktikë private e qoftë si praktikë partneriteti publik–privat, çka do të ndikojë shumë pozitivisht në rritjen e standardeve të shërbimit tonë publik spitalor.
Edhe këtë javë Shqipëria u bë mikpritëse e një samiti europian, këtë herë mes vendeve të rajonit dhe Komisionit Europian, për Planin e ri të Rritjes, ku së bashku me liderët e Ballkanit Perëndimor dhe Komisioneren Europiane për Zgjerimin, miken e paçmuar të Shqipërisë, Marta Kos dhe skuadrën e saj të ekspertëve, bëmë një bilanc të ecurisë së planit të ri të rritjes, ndamë pikëpamje të vlefshme për integrimin e mëtejshëm ekonomik në rajon dhe integrimin tonë si rajon në Tregun e Përbashkët Europian. Shqipëria tanimë nuk ndalet dot nga askush dhe për asnjë arsye, ndërkohë që kuotat e saj ndërkombëtarisht vazhdojnë të rriten, me shumë punë këtu në Shqipëri e më shumë krenari e dinjitet në përfaqësimin e Shqipërisë në arenën ndërkombëtare”, tha Rama./
