TIRANA- Të tjera detaje janë zbuluar mbi ngjarjen e rëndë që ka ndodhur ditën e sotme në Tiranë ku një 16-vjeçare plagosi veten me një copë xhami dhe kafshoi një punonjëse policie. E mitura ndodhej në gjendje të rënduar psikologjike, pasi ndjehej e përndjekur nga një person që dyshohet se ishte dërguar nga ish-i dashuri i saj, Jetmir Llanaj, 46 vjeç, aktualisht i arrestuar.
Burime bëjnë me dije se vajza kishte pasur një lidhje me Llanajn përpara arrestimit të tij në mars, ndërsa pas ndarjes kishte nisur një marrëdhënie të re, një fakt që ai nuk e kishte pranuar. Nga qelia, ai dyshohet se i kishte vënë “roje” për ta kontrolluar.
Llanaj, i njohur si “i forti” i Lezhës, është nën hetim për gjobëvënie ndaj bizneseve në Kurbin, ku sipas policisë ka përdorur edhe të mitur për të çuar mesazhe kërcënuese. Ndaj 16-vjeçares janë referuar materialet në Prokurori, ndërsa po hetohet për identifikimin e personit që e përndiqte.
Jetmir Llanaj i shpallur në kërkim për gjobvënie ndaj bizneseve ka rënë në prangat e policisë së Kurbinit më 3 mars të këtij viti. Llani ka qenë i dënuar dhe për vrasje, pasi mori hak për vrasjen e djalit të tij 9-vjeçar, Indrit Llani. Jetmir Llani u dënua me 25 vite burgim nga shkalla e parë, por Apeli e uli, ndërsa mësohet se prej disa muajsh ka kryer dënimin dhe ndodhej në liri.
Përplasja e ndodhur në verën e vitit 2012 ndërmjet familjeve Shkreta dhe Llani, coi në vrasjen e Indrit Llanit dhe në nisjen e hasmësisë mes dy fiseve. Jetmir Llani humbi djalin e tij të vogël, Indritin, ndërsa i vëllai u plagos kur mesditën e 5 qershorit djaloshi së bashku me të vëllanë, kushërirën, nënën e tij dhe xhaxhanë po udhëtonin me makinë.
Vëllezërit Altin dhe Vladimir Shkreta akuzoheshin se i kishin dalë para makinës dhe kishin qëlluar me breshëri automatiku. Pak ditë më vonë policia arrestoi autorët, ndërsa më 19 korrik 2012 plumbat i morën jetën Mark Shkretës, 71 vjeç babait të vëllezërve Altin dhe Vladimir.
Vrasja u shënua në rrugën Hoxha Tahsim në Tiranë dhe policia akuzoi Jetmir Llanin si autorin e dyshuar. Jetmir Llani dhe vëllai i tij Muharrem Llani u dënuan me nga 25 vite burg. Jetmir Llani ka qenë i dyshuar edhe për atentatin në fshatin Shpërdhet të Fushë Mamurrasit, ndaj Gentian dhe Emanuel Shkretës, djemve të 71-vjeçarit të ekzekutuar, Mark Shkreta. Ngjarja ndodhi në nëntor 2012, ndërsa humbi jetën Gentian Shkreta
