“Maduro zbrazi burgjet e tij dhe dërgoi përbindëshat në SHBA”, Trump i prerë: Dominimi amerikan në rajon s’do të vihet në dyshim!

Gjatë konferencës për shtyp në lidhje me aksionin në Venezuelë, presidenti amerikan Donald Trump listoi ato që ai i konsideroi si gabime të Nicolas Maduros.

“Maduro nuk do të jetë më kurrë në gjendje të kërcënojë një qytetar amerikan apo ndonjë person nga Venezuela”, thotë ai. “Nuk do të ketë më kërcënime.”

Ai pretendon se qeveria e Nicolas Maduros “zbrazi burgjet e tij, dërgoi përbindëshat e saj më të këqij dhe më të dhunshëm në Shtetet e Bashkuara për të vjedhur jetët e amerikanëve”.

“Ata ishin trafikantë droge. Ata ishin bosë të drogës. Ata i dërgonin të gjithë keqbërësit në Shtetet e Bashkuara, por jo më”, thotë Trump.

Ai gjithashtu përsërit pretendimet e tij se Venezuela “vodhi” naftën amerikane, pasi bizneset amerikane dyshohet se ndërtuan industrinë e naftës së vendit.

Pastaj, ai shpjegon më hollësisht ato që ai pretendon se janë themelet ideologjike të këtij operacioni:

“Të gjitha këto veprime ishin në shkelje të rëndë të parimeve thelbësore të politikës së jashtme amerikane që datojnë më shumë se dy shekuj më parë… që nga Doktrina Monroe”.

“Ne e harruam pak a shumë. Ishte shumë e rëndësishme, por e harruam.”

“Sipas strategjisë sonë të re të sigurisë kombëtare, dominimi amerikan në Hemisferën Perëndimore nuk do të vihet më kurrë në dyshim.

“Ne po e rivendosim fuqinë amerikane në një mënyrë shumë të fuqishme në rajonin tonë.”