Bisedimet për përfundimin e luftës, dy zonjat e para mbajnë në qendër të vëmendjes çështjen e fëmijëve ukrainas të rrëmbyer nga Rusia

SHBA- E gjithë bota ka qenë sy e veshë në SHBA ndërsa presidenti Donald Trump po tenton të jetë ndërmjetës mes dy homologëve të tij për t'i dhënë fund luftës mes Rusisë dhe Ukrainës. Fokusi i përpjekjeve diplomatike të SHBA-së dhe Evropës ka qenë përfundimi i luftës në Ukrainë ndërsa dy zonjat e para kanë marrë vemëndjen duke kthyer në kujtesë gjendjen e vështirë të fëmijëve ukrainas të dyshuar se janë rrëmbyer nga Rusia.

Gjatë takimit në Shtëpinë e Bardhë, presidenti ukrainas Volodymyr Zelenskyy i dorëzoi Trump një letër nga bashkëshortja e tij Olena Zelenska, në të cilën falënderohej Zonja e Parë e SHBA-së Melania Trump për thirrjes e saj për përfundimin e luftës dhe rikthimin e buzëqeshjes së fëmijëve ukrainas.

“Dua të falënderoj @FLOTUS Melania Trump për vëmendjen e saj ndaj njërës prej çështjeve më të dhimbshme dhe të vështira të kësaj lufte – rrëmbimit të fëmijëve ukrainas nga Rusia. Ne e vlerësojmë thellësisht dhembshurinë e saj dhe letrën e saj drejtuar Putinit”, shkroi Zelenskyy në një postim në X.

Ai tha se të paktën 20,000 fëmijë ishin rrëmbyer dhe se kjo çështje qëndron në zemër të tragjedisë humanitare të luftës. Melania Trump i shkroi një letër Vladimir Putinit, të cilën ia dorëzoi personalisht bashkëshorti i saj gjatë samitit në Anchorage të Alaskës të premten, duke i bërë thirrje presidentit rus të mbrojë “pafajësinë” e fëmijëve dhe të ushqejë shpresën e brezit të ardhshëm.

Trump tha të hënën se ai dhe Presidentja e Komisionit Evropian, Ursula von der Leyen, diskutuan çështjen e fëmijëve të zhdukur gjatë bisedimeve në Shtëpinë e Bardhë. Von der Leyen tha se kostoja njerëzore e luftës në Ukrainë duhet të marrë fund dhe se çdo fëmijë ukrainas i rrëmbyer nga Rusia duhet t’u kthehet familjeve të tyre.