SHBA- Sekretari amerikan i Shtetit, Marco Rubio, tha se në negociatat për Iranin është shënuar përparim i rëndësishëm, por theksoi se ende nuk ka një marrëveshje përfundimtare. Sa i përket zhvillimeve të fundit, Rubio tha se mund të ketë lajme të reja më vonë gjatë ditës, por shtoi se çdo njoftim zyrtar do të bëhet nga presidenti amerikan Donald Trump.
"Mendoj se ka të ngjarë që në orët e ardhshme, bota të marrë lajme të mira", u tha Rubio gazetarëve në New Delhi.
Sipas tij, qëndrimi i SHBA-së mbetet i pandryshuar, duke thënë se Irani nuk duhet të posedojë armë bërthamore, një pikë që ai tha se është theksuar vazhdimisht nga administrata amerikane.
Rubio u shpreh se ideja që një marrëveshje do ta vendoste Iranin në një pozitë më të fortë në çështjen bërthamore është “absurde”, duke nënvizuar se negociatat synojnë kufizimin e kapaciteteve bërthamore të Teheranit. Ai shtoi se diplomacia mbetet rruga e preferuar e Shteteve të Bashkuara për t’i dhënë fund konfliktit, duke theksuar se është bërë progres, por jo progres përfundimtar.
Rubio la të kuptohej gjithashtu se mund të ketë zhvillime pozitive lidhur me Ngushticën e Hormuzit në orët në vijim, por shtoi se ende ka punë për t’u bërë. Ai theksoi se objektivat e SHBA-së në operacionet e fundit ushtarake janë përqendruar në dobësimin e kapaciteteve ushtarake të Iranit, përfshirë flotën detare dhe aftësinë për lëshimin e raketave balistike.
Në të njëjtën kohë, agjencia iraniane e lajmeve Tasnim citoi një burim iranian, i cili thoshte se nëse Shtetet e Bashkuara vazhdojnë të nxjerrin pengesa, nuk do të ketë shanse për të arritur një memorandum përfundimtar mirëkuptimi. Siç raportohet nga Tasnim, ky burim tregoi se mosmarrëveshjet mbeten mbi një ose dy klauzola të memorandumit të mirëkuptimit midis Iranit dhe Shteteve të Bashkuara.
Gati një marrëveshje për t'i dhënë fund luftës
Qeveritë e SHBA-së dhe Iranit thanë sot se po kërkojnë të finalizojnë një marrëveshje për t'i dhënë fund luftës, duke thënë se është bërë përparim në bisedimet e tyre, me Presidentin e SHBA-së Donald Trump që pretendon se negociatat janë kryesisht të përfunduara dhe se teksti, i cili mbetet për tu nënshkruar, do të sigurojë hapjen e Ngushticës së Hormuzit.
Që nga fillimi, media amerikane ka raportuar që marrëveshja do të lejojë anijet tregtare të rifillojnë kalimin nëpër këtë arterie detare, jetësore për ekonominë ndërkombëtare, dhe do të lehtësojë sanksionet që po e mbytin ekonominë iraniane. Sipas një raporti të CBS News, i cili citoi burime të njohura me përmbajtjen e bisedimeve, propozimi i fundit amerikan përfshin lirimin e disa fondeve iraniane të ngrira në bankat e huaja dhe vazhdimin e negociatave për 30 ditë të tjera.
Marrëveshja që po shqyrtohet nuk zgjidh se si Irani do të heqë qafe rezervat e tij të uraniumit të pasuruar shumë. Sipas New York Times, mbetet për tu shqyrtuar në raundin e ardhshëm të negociatave, në javët ose muajt e ardhshëm. Zëdhënësi i Ministrisë së Jashtme iraniane tha dje se Teherani është në "fazën e finalizimit" të një marrëveshjeje protokollare me Shtetet e Bashkuara.
Kryeministri pakistanez Shahbaz Sharif, ndërmjetësi në negociata, ka thënë se një marrëveshje është afër. Raundi i parë dhe i vetëm deri më tani i pafrytshëm i negociatave u mbajt në Islamabad më 11 prill, me të pranishëm zëvendëspresidentin e SHBA-së J.D. Vance dhe zyrtarë të lartë iranianë, përfshirë kryetarin e parlamentit, oficerin në pension të Gardës Revolucionare dhe politikanin me ndikim Mohammad Bayer Ghalibaf, si dhe Ministrin e Jashtëm Abbas Araghchi.
