Plagoset me armë zjarri 17-vjeçari në Tiranë/ Shoku i tij po i tregonte armën, arrestohet autori dhe dy persona të tjerë! Të rinjtë tentuan të fshihnin ngjarjen

 

TIRANË- Policia e Tiranës ka zbardhur ngjare e ndodhur gjatë natës në Tiranë, ku një 17-vjeçar mbeti i plagosur. Blutë bëjnë me dije, se plagosja ka ndodhur aksidentalisht, teksa një 19-vjeçar po i tregonte armën e tij pistoletë shokut. Duke menduar se nuk kishte fishek në fole, i riu e ka shkrepur aksidentalisht dhe për pasojë është plagosur 17-vjeçari.

Si pasojë në pranga ka rënë 19-vjeçari me inicialet R.S, për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”. Gjithashtu në pranga u vunë edhe 20-vjeçari me inicialet A.V dhe 22-vjeçari me inicialet, H.H, për veprën penale “Veprime që pengojnë zbulimin e së vërtetës”. Ndërkohë 17-vjeçari ndodhet në spital, nën kujdesin e mjekëve.

Plagosi aksidentalisht me armë zjarri shokun e tij, vihet në pranga 19-vjeçari. Vihen në pranga edhe 2 shtetas të tjerë, shokë të tyre. Sekuestrohet arma e zjarrit që 19-vjeçari e posedonte pa leje.

Rreth orës 01:40, pas njoftimit se në rrugën “Berit Beker” ishte plagosur me armë zjarri një 17-vjeçar, shërbimet e Sektorit për Hetimin e Krimeve të Rënda kanë shkuar menjëherë në vendngjarje, me qëllim sqarimin e rrethanave dhe dokumentimin e plotë ligjor të rastit.

Nga veprimet e para hetimore rezulton se në banesën e shtetasit R. S., 19 vjeç, ky i fundit, duke i treguar armën e zjarrit pistoletë shokut të tij dhe duke menduar se nuk kishte fishek në fole, e ka shkrepur aksidentalisht dhe për pasojë është plagosur 17-vjeçari. Në përfundim të veprimeve të para hetimore:

-u bë arrestimi në flagrancë i shtetasit R. S., 19 vjeç, për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”;
-u arrestuan shtetasit A. V., 20 vjeç dhe H. H., 22 vjeç, për veprën penale “Veprime që pengojnë zbulimin e së vërtetës”.

17-vjeçari ndodhet në spital, nën kujdesin e mjekëve. Vijojnë hetimet për dokumentimin e plotë të rastit dhe sqarimin e të gjitha rrethanave të ngjarjes. Materialet procedurale i kaluan Prokurorisë, për veprime të mëtejshme