Eni Vasili tregon takimin e fundit me Gerti Bogdanin: Djali më qytetar i politikës, ja si u ndje dje në mbrëmje

Ish-deputeti i Partisë Demokratike, Gerti Bogdani, ndërroi papritur jetë sot në moshën 45-vjeçare duke shtangur jo vetëm radhët e partisë ku bënte pjesë por të gjithë politikën në vend.

“Po ndihem keq”, ishin fjalët e tij teksa konsumonte kafenë me miq në kryeqytet. Dalja e fundit e tij publike ishte në emisionin “Open” të gazetares Eni Vasili, pikërisht mbrëmjen e djeshme.

Me fjalë të zgjedhura, ai bëri një analizë të hollë të zgjedhjeve në Shtetet e Bashkuara dhe atentateve ndaj Donald Trump, si dhe foli për situatën në Kosovë pas tensionimit të raporteve me Serbinë.

Vetë gazetarja Eni Vasili, i ka kushtuar disa fjalë Gertit në një status në profilin e saj zyrtar në Instagram. Për të, si për të gjithë, ky lajm ishte i papritur, edhe për faktin se mbrëmë e kishte të ftuar në studio:

“Dje mbrema Gerti performoi mencur dhe qete si zakonisht. Nuk dha asnje shenje per tragjedine me te cilen do na trondiste sot te gjitheve. Ndjehem thellesisht e prekur dhe e tronditur nga lajmi per largimin e parakohshem te Gertit nga kjo jete aq me shume kur duhet te jem nga te fundit njerez qe ai ka takuar para udhetimit te tij te fundit. Do ta kujtoj ate, si Gertin e qeshur , disponibel te pergatitur dhe djalin me qytetar te politikes. Ngushellime Edlires, femijeve dhe gjithe familjareve,” shkruan Vasili.

Gerti Bogdani kohët e fundit ishte larg politikës aktive, por asnjëherë nuk e shkëputi aktivizmin e tij në radhët e Partisë Demokratike. Vitin e kaluar ai u bë pjesë e primareve të PD për të qenë kandidat për kryetar të Bashkisë së Tiranës.